உங்கள் கணவர் என்ன வேலை செய்தால் வெற்றி பெறுவார்?

எல்லா பெண்களுமே தங்களுக்கு வரப்போகும் கணவர் என்ன தொழில் செய்கிறார் என்பதை அறிந்துகொள்ள ஆவலாக இருப்பார்கள். இன்றைய சூழலில் ஆண்களும் தங்களுக்கு வரும் மனைவி வேலை செய்கிறவளாக இருக்க வேண்டும் என்றே விரும்புகின்றனர். ஆண்- பெண் இருவருக்குமே திருமணப் பேச்சு ஆரம்பித்தவுடன் முதல் எண்ணம் இதுவாகத்தான் இருக்கும். இதற்கு அவரவர் ஜாதகத்தில் 4-ஆம் பாவத்தை வைத்து வரப்போகும் கணவரோ மனைவியோ என்ன தொழில் செய்வார் என்று ஓரளவு தெரிந்து கொள்ளலாம். 4-ஆம் அதிபதி சுப பலம் பெற்று பலமாக இருந்தால், கீழே சொல்லப்பட்டுள்ள வேலைகளில் தலைமைப் பொறுப்பில் இருப்பார்கள் என்றும்; 4-ஆம் அதிபதி பலம் குறைந்திருந்தால் அந்தந்த வேலையில் குறைவான சம்பாத்தியம் உடையவர் என்றும் அறிந்து கொள்ளலாம். இனி 12 ராசியினருக்கும் தங்கள் வாழ்க்கைத் துணை என்ன வேலை செய்வார் என பார்ப்போம்.

மேஷம்

இவர்களின் வாழ்க்கைத் துணை நீர் சம்பந்தமான தொழில், பெட்ரோல் சம்பந்தமான தொழில், ஹோட்டல் நடத்துவது, கப்பல் தொழிலில் வேலை, மின் சம்பந்தமான தொழில், கடல் ஆராய்ச்சி, குழாய், கிணறு தோண்டுவோர், பால், காய்கறிகள் சம்பந்தமான தொழில், முத்து, சுற்றுலா, துணி வியாபாரம், உப்பு போன்ற தொழில்களைச் செய்வார். மேஷ ராசிக்கு சந்திரன் பலமாக இருந்தால் இத்தொழில்களில் மேன்மையான புகழ், செல்வத்தோடு பணி புரிவார். சந்திரன் பலம் குன்றி இருந்தால் குறிப்பிட்ட தொழில்களில் சுமாரான வேலை கிடைக்கும்.

ரிஷபம்

இவர்களுக்கு சூரியன் பலமாக இருந்தால் அரசு அதிகாரிகள், அரசியல் தலைவர்கள், மருத்துவம் சார்ந்த தொழில், தந்தையின் பரம்பரைத் தொழில், வனத்துறையில் வேலை, இயக்குநர், கவுன்சிலர், ஷேர் புரோக்கர்கள், கொள்கலன்கள், பேக்கிங் உபகரணங்கள் விற்பனை போன்ற தொழில்களைச் செய்வர். சூரியனின் பலத்தைப் பொறுத்து பணியில் ஏற்ற- இறக்கம் இருக்கும். பணியில் கண்டிப்புடன் இருப்பர். அநேகமாக ஒரே இடத்தில் செய்யும் வேலை சிலருக்கு அமையலாம்.

மிதுனம்

பேராசிரியர், ஆசிரியர், கணக்காளர், ஜோதிடர், அச்சு சம்பந்தமான தொழில், மொழிபெயர்ப்பாளர், வணிகர், புரோகிதர், புரோக்கர், நூல் வெளியீட்டாளர், ஆடிட்டர்கள் போன்ற தொழிலில் இருப்பர். இவர்கள் சொந்த இடத்திலிருந்து அவ்வப்போது சிறிது அலைந்து வேலை பார்ப்பர். புதன் பலமாக இருப்பது அவசியம்.

கடகம்

வெள்ளி, பட்டு, ஆபரணங்கள், ஓவியம், இசை சம்பந்தப்பட்ட தொழில், வரவேற்பாளர், பாடகர், ரசாயனப் பரிசோதகர், பால், ஜாம், ஊறுகாய் உற்பத்தியாளர், போக்குவரத்து ஏஜெண்ட், கட்டடம் சம்பந்தமான தொழில் அமையும். சுக்கிரனைப் பொறுத்து தொழிலில் மேன்மை வேறுபடும். இவர்கள் ஓயாமல் அலைந்து கொண்டே பணிபுரியும் நிலை இருக்கும்.

சிம்மம்

அறுவை சிகிச்சை மருத்துவர், ஆய்வாளர், ராணுவம் சம்பந்தப்பட்ட தொழில், பல் மருத்துவர், கப்பல் தொழிலாளர், அணைக்கட்டு, நீர் விநியோகப் பணியாளர்கள் போன்ற வேலைகளைச் செய்வர். மேலும், தோல் பதனிடும் இடத்திலும் இரும்புக் கிடங்கு போன்ற இருட்டு- பள்ளம் நிறைந்த இடங்களிலும் தொழில் புரிவர். செவ்வாயின் பலத்தைப் பொறுத்து வேலையில் மேன்மை அமையும்.

கன்னி

ஆசிரியர், நீதிபதி, பேச்சாளர், அரசியல்வாதி, விளம்பரத் தொழில், கட்டடத் தொழில், போக்குவரத்துத் தொழில், மருந்துகள் சம்பந்தமான தொழில், பள்ளி, கல்லூரி, தேவாலயங்கள் போன்ற இடங்களில் வேலை செய்வர். குருவின் பலத்தைப் பொறுத்து பணியில் உயர்வு- தாழ்வு அமையும். பணியில் கண்டிப்பாக நடந்துகொள்வர்.

துலாம்

மருத்துவர், துப்பறியும் நிபுணர், கைரேகை நிபுணர், பழைய பொருட்கள் சேகரிப்போர், வேளாண்மைத் தொழில், பாலம் கட்டும் தொழில், ராணுவத் தொழில், சர்வேயர், நெருக்கமான- இருட்டான இடத்தில் பணி, பழைய- மறைவான கட்டடத்திலும் பணிபுரிவர். சனியின் பலத்தைப் பொறுத்து மேன்மை அமையும். மிகவும் தேவையான பணி நேரத்தில் மட்டுமே அலைச்சல் மேற்கொள்வர்.


விருச்சிகம்

அறிவியல் அறிஞர்கள், சுரங்கப் பொருட்கள் சம்பந்தமான வேலை, தோல் நோய் மருத்துவர், ரசாயனம், மெக்கானிகல் இஞ்ஜினீயர், மின்சாரம் சம்பந்தமான அனைத்து தொழில்கள், ஏற்றுமதியாளர்கள், வண்ணம் சம்பந்தமான தொழில் போன்றவற்றை மேற்கொள்வர். சனியின் பலத்தைக் கொண்டு உயர்வு- தாழ்வு அமையும். இவர்கள் அமைதியாக இருப்பதுபோல் தோன்றினாலும், உள்ளுக்குள் படபடப்பாகப் பணிபுரிவர்.

தனுசு

அரசியல்வாதி, அமைச்சர், பேராசிரியர், சினிமா நடிகர், மது சம்பந்தமான தொழில், மருந்து, எண்ணெய், வாசனைப் பொருட்கள், மீன் கண்காட்சி சாலையில் வேலை, துறைமுகத் தொழிலாளர், கைரேகை, எண் கணித வல்லுநர், கப்பலில் வேலை, சாது, சந்நியாசி என்று வாழ்க்கை நிலை அமையும். பொதுவாக இவர்கள் ஈரம் சூழ்ந்த இடங்களில் பணிபுரிவர் அல்லது பதனிடும் இடங்களில் பணிபுரிவர். குருவின் பலத்தைக் கொண்டு ஏற்ற- இறக்கம் உண்டாகும்.





மகரம்

போலீஸ் துறையில் வேலை, ரயில்வேயில் வேலை, விளையாட்டு சம்பந்தமான பொருட்கள் விற்பனை, சமையல் கலை, குத்துச்சண்டை வீரர், தொழிற்சாலைகளில் பணி, அறுவை சிகிச்சை மருத்துவர், ராணுவத்தில் வேலை, கடிகாரம் சம்பந்தமான வேலை, தீப்பெட்டி, பட்டாசு சம்பந்தமான தொழில், பெரிய வாகனங்கள் சம்பந்தமான தொழில் புரிவர். செவ்வாயின் பலத்தைப் பொறுத்து தொழில் நிலை அமையும். இவர்கள் பொதுவாக வெப்பமான இடத்தில் தொழில் புரிவர். தொழிலில் கடுமையாக நடந்து கொள்வர்.

கும்பம்

தோட்டம் சம்பந்தமான தொழில்கள், பேங்க் வேலை, விவசாயிகள், டிரைவர்கள், சினிமாவில் வேலை, வண்ணம் பூசுபவர், பூக்கடை வைத்திருப்போர், கண்ணாடி, பிளாஸ்டிக், பட்டு, பருத்தி, பால், ஐஸ்கிரீம், காய்கறி, பெட்ரோல், அரிசி விற்பனை போன்ற தொழில் செய்வர். (இந்த ராசிப் பெண்கள் பெரும்பாலும் பெண்கள் சம்பந்தமான ஆடம்பரப் பொருட்களை விற்பனை செய்பவராக அமைவர்) பணியில் உறுதியான மனப்பான்மை கொண்டவர்கள். சுக்கிரனின் பலம் முக்கியம்.

மீனம்

நாளிதழ், வார இதழ் ஆசிரியர்கள், தூதரக அலுவலர், தபால்காரர், விற்பனையாளர், புகைப்படக் கலைஞர், பேருந்துத் தொழிலாளர், மொழிபெயர்ப்பாளர், வழிகாட்டி, வழக்கறிஞர், காரியதரிசி, மூக்கு கண்ணாடித் தொழில், பச்சை நிறம் கொண்ட பொருட்கள், ரயில்வேயில் வேலை போன்ற தொழிலைச் செய்வார். புதனின் வலு முக்கியம். இவர்கள் எப்போதும் அலைந்து திரிந்து கொண்டே பணி புரிவர்.

பெண்களின் ஜாதகத்தைக் கொண்டு பலன் காணும்போது அவர்கள் கணவரின் வேலைக்குரிய கிரகம் பலமிழந்து இருந்தால், அந்த குறிப்பிட்ட கிரகத்திற்குரிய பரிகாரம் செய்தால் வேலையில் நிறைவும் பணவரவும் கிடைக்கும்.

ஆண்- பெண் இருபாலருக்கும் சம்பந்தப்பட்ட கிரகம் 9, 12-ஆம் இடங்களுடன் சம்பந்தப்பட்டாலும்; சர ராசிகள் சம்பந்தப்பட்டாலும் வெளியூர், வெளிநாட்டில் வேலை கிடைக்கும் வாய்ப்புகள் உருவாகும்.

சம்பந்தப்பட்ட கிரகம் சனியின் ராசியிலோ சனியின் அம்சத்திலோ சனியின் பாதத்திலோ இருந்து, நீசமாகியும் கெட்டும் பலமிழந்தும் இருந்தால் துணைவர் வேலைக்குச் செல்லாமல் தூங்கியே பொழுதைக் கழிப்பார்.