சிறையிலும் நல்லவங்க - விடுதலையான புஷ்பவள்ளி பாட்டி!

திருச்சி பெண் கள் சிறையில் இருந்து வெளி யில் வந்த புஷ்பவள்ளி பாட்டியின் கண்களில் கண்ணீர்த்திரை.

அறிஞர் அண்ணா பிறந்தநாளை முன்னிட்டு, இந்த ஆண்டு விடுதலை செய்யப்பட்ட 13 கைதிகளில், 80 வயதுப் பாட்டி புஷ்பவள்ளியும் ஒருவர்.

""எப்படிக் கூட்டிக்கழிச்சுப் பார்த் தாலும் இன்னும் 10 வருஷத்தை நான் ஜெயில்லதான் கழிக்கணும். அது வரைக்குமா என் உடம்புல உசுரு இருக்கப் போகுது? ஜெயில்லதான் எனக்குச் சாவுனு திடமா நம்புனேன். புண்ணியவான் கலைஞர் அய்யா உத்தரவு போட்டு என்னை விடுதலை செஞ்சுட்டாங்க. என் பேரன் பேத்தி மக்க முன்னால சாகிற குடுப்பினை எனக்கு கெடைச்சிருக்கு... அறிஞர் அண்ணா பேரைச் சொல்லி என்னை விடுதலை செய்யச் சொன்ன கலைஞர் அய்யாவுக்கு என்னோட நன்றியைச் சொல்லுங்கய்யா!'' மகிழ்ச்சியில் தழுதழுத் தார் பாட்டி.

விடுதலையான பாட்டியின் மடியில், 8000 ரூபாய் இருந்தது. ""கடைசிக் காலத்தில எனக்கு உதவியா இருக்கும்னு கலெக்டரய்யா சவுண் டையா 3000 தந்தார். சிறை மீண்டோர் மறு வாழ்வு சங்க பொருளாளர் கோவிந்த ராஜய்யா 5000 தந்தார். நான் வெளியே வந்தது... வீட்டுக்குப் போகப் போறது... எல்லாமே ஒரு கனவு மாதிரி நிறைவேறுது...!'' கண்களைத் துடைத்துக் கொண்டார்.

தனிக்குடித்தனம் போக விரும்பிய மருமகள் கவிதாவின் மீது மண்ணெண்ணெய் ஊற்றிக் கொளுத்திக் கொன்ற வழக்கில், 1998-ல் கைதாகி, 15 நாளில் ஜாமீனில் வெளியே வந்தார் பாட்டி. 2000-ஆம் ஆண்டில், நாகை நீதிமன்றம் ஆயுள் தண்டனை விதித்தது. மீண்டும் சிறை வாசம். உயர்நீதிமன்றத்தில் மனு செய்தார்கள். ஜாமீனில் வந்தார் பாட்டி. 3.10.2005-ல் ஆயுள் தண்டனையை உறுதி செய்தது உயர்நீதிமன்றம். மீண்டும் சிறையில் அடைக்கப்பட்டார் புஷ்பவள்ளி பாட்டி.

""உங்க சிறை அனுபவங்களைப் பற்றி சொல்லுங்க பாட்டி!''.

""குடும்பத்தினரோடு வீட்டில இல்லைங்கிறது தவிர வேற குறையொண்ணுமில்லை. ஜெயில்ல ரொம்ப வயசானவ நான்தான். எல்லாக் கைதிகளும் "செல்லப் பாட்டியா' கவனிச்சுக்கிட்டாங்க. சாப்பாடு கூட வேளா வேளைக்கு டான்னு நான் இருக்கிற இடத்துக்கே வந்துடும். அதான் சொல்றன்ல... வீட்ல கூட இவ்வளவு சிறப்பா கவனிக்க மாட்டாங்க. அந்த அளவுக்கு கவனிச்சிக்கிட்டாங்க. சிறையிலயும் ரொம்ப ரொம்ப நல்ல மனுஷங்க எல்லாம் கைதிகளா இருக்காங்க. தம்பி... இங்க கைத்தொழில்களெல்லாம் கத்துக் கொடுக்கிறாங்க. என்னாலதான் முழுசா எதையும் கத்துக் கொள்ள முடியலை!'' -சிரித்துக் கொண்டார் பாட்டி.

""பாட்டி... நீங்க எந்த ஊர்னு சொல்லலையே!''.

""நாகப்பட்டினம்... என் புருஷன் தங்கராஜ். 5 பையன் கள் ஒரு பொண்ணு. எல்லாருக்கும் கூலி வேலைதான். என் வாழ்க்கையில இப்படியொரு களங்கம்... ம்... என் பேரனுக்கு சொல்லி விட்டிருக்கோம். இப்ப வந்திடுவான்... அதோ...!'' விடைபெற்ற பாட்டி வீட்டுக்குக் கிளம்பினார்.